తెలంగాణ ప్రత్యేక రాష్ట్రం ఏర్పడి 12 ఏళ్లు గడిచినా ఉద్యమ ఆశయాలు ఇంకా నెరవేరలేదని బీజేపీ జాతీయ అధ్యక్షుడు నితిన్ నబీన్  అన్నారు. తెలంగాణ వేగవంతమైన అభివృద్ధిని సాధించేందుకు ‘డబుల్ ఇంజిన్ ప్రభుత్వం’ ఏర్పాటుకు కృషి చేయాలని పార్టీ శ్రేణులకు  పిలుపునిచ్చారు. నితిన్ నబీన్ మూడు రోజుల పర్యటన కోసం ఆదివారం తెలంగాణకు వచ్చారు. ఈ సందర్బంగా రంగారెడ్డి రూరల్ బీజేపీ కార్యాలయాన్ని ప్రారంభించారు. అలాగే రాష్ట్రంలోని 8 బీజేపీ కార్యాలయాలను నితీన్ నబీన్ వర్చువల్‌గా ప్రారంభించారు.

ఆంధ్రప్రదేశ్‌లో తోతాపురి మామిడి పండించే రైతులు ప్రస్తుతం ఎదుర్కొంటున్న తీవ్ర ఆర్థిక సంక్షోభంపై ముఖ్యమంత్రి నారా చంద్రబాబు నాయుడు స్పందించారు. ఈ విషయంలో జోక్యం చేసుకుని రాష్ట్ర రైతులకు అండగా నిలవాలని కోరుతూ కేంద్ర వ్యవసాయ శాఖ మంత్రి శివరాజ్ సింగ్ చౌహాన్‌కు సీఎం ఒక లేఖ రాశారు. అంతర్జాతీయంగా చోటుచేసుకున్న భౌగోళిక, ఆర్థిక పరిణామాల వల్ల మ్యాంగో పల్ప్ (మామిడి గుజ్జు) ఎగుమతులు నిలిచిపోయాయని, దీని ప్రభావం స్థానిక మార్కెట్‌పై తీవ్రంగా పడిందని ఆయన లేఖలో వివరించారు.

ప్రతిష్టాత్మకమైన మూసీ నది ప్రక్షాళన ప్రాజెక్టును ఎవరు అడ్డుకున్నా వదిలిపెట్టేది లేదని నల్గొండ పర్యటనలో సభలో సీఎం రేవంత్ రెడ్డి తీవ్రస్థాయిలో హెచ్చరించారు. “మూసీ ప్రక్షాళనకు ఎవరు అడ్డుపడినా, ఆఖరికి ఆత్మహత్యలకు పాల్పడతామని బెదిరించినా వెనక్కి తగ్గేదే లేదు.. అడ్డువచ్చిన వారిని మూసీలోనే వేసి తొక్కుతాం” అంటూ సీఎం చేసిన వ్యాఖ్యలు రాష్ట్ర రాజకీయాల్లో తీవ్ర దుమారం  రేపుతున్నాయి. హైదరాబాద్‌తో పాటు పరివాహక ప్రాంతాల ప్రజల భవిష్యత్తును మార్చడమే తమ ప్రభుత్వ లక్ష్యమని, ఇందులో ఎలాంటి  రాజీ ఉండబోదని ఆయన స్పష్టం చేశారు.