కేంద్ర ప్రభుత్వం కొత్తగా తీసుకొచ్చిన జీఎస్టీ స్లాబ్స్ సోమవారం నుంచి అమల్లోకి వస్తున్నాయి. తద్వారా అనేక ఉత్పత్తులపై ధరలు భారీగా తగ్గబోతున్నాయి. దీని వల్ల రాష్ట్ర ప్రజలకు రూ.8వేల కోట్ల ప్రయోజనం ఉంటుందని ఆంధ్రప్రదేశ్ ముఖ్యమంత్రి నారా చంద్రబాబు నాయుడు తెలిపారు. ఈ మేరకు జీఎస్టీ 2.0కి సంబంధించిన జీవోలను సీఎం విడుదల చేశారు. ఉండవల్లిలోని క్యాంపు కార్యాలయంలో జీఎస్టీకి సంబంధించి తెలుగు జీవోల బుక్‌లెట్‌ను ముఖ్యమంత్రి ఆవిష్కరించారు. అనంతరం అధికారులతో రాష్ట్ర పన్నుల విధానంపై సమీక్షించారు.

తనను కుటుంబానికి దూరం చేసేందుకు కుట్ర పన్నిన వారిని వదలిపెట్టనని తెలంగాణ జాగృతి అధ్యక్షురాలు కల్వకుంట్ల కవిత హెచ్చరించారు. తల్లిని, తండ్రిని కాకుండా వేరు చేశారని ఆమె ఆవేదన వ్యక్తం చేశారు. కవిత తన స్వగ్రామం చింతమడకలో గ్రామస్తులతో కలిసి నేడు ఎంగిలి పూల బతుకమ్మ వేడుకల్లో పాల్గొన్నారు. ఈ సందర్భంగా ఆమెకు ఒగ్గుడోలు, డప్పు వాయిద్యాలతో స్థానికులు ఘన స్వాగతం పలికారు. అంతకుముందు చింతమడక శివాలయంలో ప్రత్యేక పూజలు, అభిషేకం చేశారు.

దుబాయ్ ఇంటర్నేషనల్ స్టేడియంలో ఆసియా కప్‌ భారత్ చిరకాల ప్రత్యర్థి పాకిస్థాన్‌తో తలపడుతుంది. ఈ మ్యాచ్ లో టాస్ గెలిచిన భారత్ ముందుగా బౌలింగ్ ఎంచుకుంది. దీంతో పాకిస్తాన్ జట్టు ముందుగా బ్యాటింగ్ చేయనుంది. ప్లేయింగ్ ఎలెవన్‌లో భారత్ రెండు మార్పులు చేసింది. జస్ప్రీత్ బుమ్రా, వరుణ్ చక్రవర్తి తిరిగి ప్లేయింగ్ ఎలెవన్‌లోకి వచ్చారు. ఒమన్‌తో జరిగిన మ్యాచ్‌లో ఆడిన హర్షిత్ రాణా, అర్ష్‌దీప్ సింగ్‌లను జట్టులోకి తీసుకోలేదు.

తెలంగాణ సాంస్కృతిక వైభవానికి ప్రతీకగా నిలిచే బతుకమ్మ పండుగ రాష్ట్రవ్యాప్తంగా అంగరంగ వైభవంగా ప్రారంభమైంది. రాష్ట్ర ప్రభుత్వం ఆధ్వర్యంలో హన్మకొండలోని చారిత్రక వేయి స్తంభాల గుడి వద్ద రాష్ట్రస్థాయి బతుకమ్మ వేడుకలు ఘనంగా జరిగాయి. ఈ వేడుకల్లో ఉప ముఖ్యమంత్రి మల్లు భట్టి విక్రమార్క, మంత్రులు కొండా సురేఖ, సీతక్క, జూపల్లి పాల్గొన్నారు. వందలాది మంది మహిళలు, బాలికలు ఇందులో పాల్గొన్నారు. తీరొక్క పువ్వులు, గుమ్మడి పువ్వులు, తంగేడు పువ్వులు, కట్లపువ్వులతో అలంకరించిన బతుకమ్మలు అందరినీ ఆకట్టుకున్నాయి.

జీఎస్టీ, ఆదాయపు పన్ను తగ్గింపు వల్ల ప్రజలు గతంలో రూ.2.5 లక్షల కోట్లు ఆదా చేసుకున్నారని ప్రధాన మంత్రి నరేంద్ర మోదీ అన్నారు. తాజా జీఎస్టీ 2.0 సంస్కరణలతో వ్యాపారాలు సులభతరం అవుతాయని, పెట్టుబడులు ఆకర్షణీయంగా మారతాయని ఆయన పేర్కొన్నారు. జీఎస్టీ సంస్కరణలపై నేడు జాతినుద్దేశించి ప్రసంగించిన మోదీ.. పలు కీలక అంశాలను ప్రస్తావించారు. నవరాత్రి తొలిరోజు నుంచి ‘జీఎస్టీ బచత్ ఉత్సవ్’ ప్రారంభమవుతుందని..ఇది పేదలకు, మధ్యతరగతి ప్రజలకు డబుల్ బొనాంజా ఇస్తుందని ప్రధాని అన్నారు.

తెలంగాణ జిల్లాలకు అలర్ట్. రాష్ట్రంలోని పలు జిల్లాల్లో కాసేపట్లో భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం తెలిపింది. రంగారెడ్డి, యాదాద్రి, నల్గొండ, వరంగల్, సూర్యాపేట, ములుగు, ఖమ్మం, భద్రాద్రి కొత్తగూడెం, మహబూబాబాద్ జిల్లాల్లో కాసేపట్లో వర్షం ప్రారంభమయ్యే అవకాశం ఉందని ముందస్తు హెచ్చరిక జారీ చేసింది.