అనంతపురం జిల్లా కళ్యాణదుర్గం ఎక్సైజ్ సీఐ వివాదంలో చిక్కుకున్నారు.. ఆమె ఆఫీస్‌బాయ్‌పై చెప్పుతో దాడి చేసిన ఘటన కలకలం రేపింది. ‘మద్యం అక్రమంగా విక్రయిస్తున్న వారి నుంచి నీవు డబ్బులు వసూలు చేసుకొని నాపై చెబుతావా.. నా మీద లేనిపోని ఆరోపణలు చేస్తావా’ కళ్యాణదుర్గం ఎక్సైజ్‌ సీఐ హసీనాభాను ఆఫీస్‌ బాయ్‌ని చెప్పుతో కొట్టారు. కొంతకాలంగా తన పేరు చెప్పి డబ్బులు వసూలు చేస్తున్నారని హాసీనాభాను చెబుతున్నారు.. అయితే అటెండర్ మాత్రం తనకు ఏం తెలియదు అంటున్నారు.

శేషాచలం అడవుల్లోకి అక్రమంగా ప్రవేశించే వారి భరతం పట్టేందుకు అటవీ శాఖ సమాయత్తమైంది. కొండలు, గుట్టలు దాటి సాహస యాత్రలకు వెళ్లే ముఠాలపై నిఘా పెట్టింది. నిబంధనలు ఉల్లంఘిస్తే మాత్రం ఖబడ్దార్! తలకోన, అన్నమయ్య జిల్లాల్లోని అటవీ ప్రాంతాల్లో రహస్యంగా ట్రెక్కింగ్ నిర్వహిస్తున్న వారి గుట్టు రట్టు చేసేందుకు ప్రత్యేక కమిషన్ రంగంలోకి దిగింది. సోషల్ మీడియా ద్వారా ట్రెక్కర్లను ఆకర్షిస్తూ డబ్బులు వసూలు చేస్తున్న ట్రెక్కింగ్ సంస్థలపై చర్యలు తీసుకోవడానికి అటవీ శాఖ సిద్ధమవుతోంది.

కేంద్రం జాతీయ ప్రాజెక్టు హోదా ఇచ్చిన ఆంధ్రప్రదేశ్‌లోని పోలవరం ప్రాజెక్టు గురించి మే 28న ఉన్నత స్థాయి సమీక్ష నిర్వహించనున్నారు ప్రధాని మోదీ. ఈ ప్రాజెక్టుకు సంబంధించిన వివిధ అంశాలను వీడియో కాన్ఫరెన్స్ ద్వారా తెలంగాణ, ఆంధ్రప్రదేశ్, ఒడిశా, ఛత్తీస్‌గఢ్ ముఖ్యమంత్రులతో సంభాషించనున్నట్లు సమాచారం. ముంపు ప్రభావిత ప్రాంతాల్లో పబ్లిక్‌ హియరింగ్‌ నిర్వహించడంపై ఆయా రాష్ట్రాల ప్రభుత్వ ప్రధాన కార్యదర్శులకు దిశానిర్దేశం చేయనున్నారు.

ఆంధ్రప్రదేశ్ రాష్ట్ర ప్రభుత్వం (AP Govt) విద్యుత్ రంగంలో కీలక నిర్ణయం తీసుకుంది. ట్రాన్స్కో, జెన్కో, డిస్కం(Transco, Genco, Discom)లలో ఉద్యోగుల సమ్మెలను నిషేధిస్తూ ఉత్తర్వులు జారీ చేసింది. తదుపరి ఆరు నెలల పాటు ఈ నిషేధం అమల్లో ఉంటుందని ప్రభుత్వం స్పష్టం చేసింది. అత్యవసర సేవల నిర్వహణ చట్టం (ESMA)-1971 ప్రకారం ఈ నిర్ణయం తీసుకున్నట్లు అధికారికంగా ప్రకటించారు.